- Non falas galego pero prestaríache?
- Fálalo pero sen soltura e queres mellorar?
Por segundo ano a A.X. Xiradela súmase á iniciativa ‘FALARMOS… NÓS’ da Deputación da Coruña
Falarmos… Nós, son grupos de conversa que buscan fomentar o uso oral do galego entre persoas que o coñecen, pero non o empregan habitualmente, ben por falta de apoio na súa contorna ou por seren persoas chegadas de fóra que aínda están en proceso de aprendizaxe.
A través desta iniciativa da Deputación da Coruña xeramos contornas seguras nas que perder o medo a falar e recuperar a confianza no uso da lingua fóra de contextos formais ou académico.
Non son clases de lingua. Non se impartirán contidos gramaticais nin ortográficos, senón que se fomentará a práctica da conversa nun ambiente seguro e participativo. É dicir, conversamos e así aprendemos coa guía dunha persoa, neste caso a nosa compañeira Carmen Pereiro que dinamiza o grupo.
Falarmos… Nós será os xoves pola tarde
É unha actividade de balde, pero con prazas limitadas na que priorizaremos as persoas socias da A.X. Xiradela. O grupo de conversa Falarmos… Nós da A.X. Xiradela xuntarase os xoves de 18:30 a 19:30 horas nas instalacións da asociación arteixá e ten previsto retomarse a partir de setembro de 2026.
Para recibir máis información podes dirixirte a Xiradela a través do enderezo electrónico: xiradela@yahoo.es.
